လက်ဖက်ရည်မှာ ပါတာက အဖန်ရည်ရယ်၊ နို့စိမ်းရယ်၊ နို့ဆီရယ်ပါ။ တချို့က နွားနို့နဲ့လုပ်ကြတယ်။ နွားနို့နဲ့လုပ်တဲ့လက်ဖက်ရည်က မြန်မာပြည်ကနဲ့သိပ်မတူပါဘူး။ အဲ့တာကြောင့် ဆိုင်တွေကလို သောက်ချင်ရင် နို့စိမ်းနဲ့ပဲဖျော်ပါ။ လက်ဖက်ရည်ကို ချက်ချင်းသောက်မယ်ဆိုရင်တော့ အခုလိုဖျော်နိုင်ပေမယ့်။ နောက်ရက်ကော သောက်ရန် အတွက်သိမ်းထားမယ်ဆိုရင်တော့ နို့စိမ်းကို ပွက်အောင်အရင်တည် ပြီးရင် နို့စိမ်းထဲကို နို့ဆီထည့် ပြီးမှ အဖန် ရည်နဲ့ရော ရင် ၃ ရက် ၄ ရက်လောက်အထိ ရေခဲသေတ္တာထဲ ထည့်ပြီး ပြန်နွှေးရင် သောက်လို့ကောင်းပါတယ်။
ပါ၀င်ပစ္စည်းများ
- လက်ဖက်အချိုခြောက် - ထမင်းစားဇွန်း ၄ ဇွန်း (ဖန်တာကြိုက်လျှင် ၁ ဇွန်းပိုထည့်ပါ။)
- နို့စိမ်း
- နို့ဆီ
- မလိုင် (ရှယ်သောက်ချင်ရင်တော့ ထည့်ပါ။)
- ရေ - ၂ လီတာ
ပြုလုပ်နည်း
၁။ အိုးတခုထဲကို လက်ဖက်အချိုခြောက်နှင့် ရေတလီတာအရင် ထည့်ပြီး အိုးတွင် ရေအမှတ်ကို မှတ်ထားပါ။ ထို့နောက်နောက်ထပ်ရေတလီတာထည့်ပြီး မီးဖိုပေါ်တွင် မီးအေးအေးဖြင့် အဖန်ရည် နှပ်ပါ။ (အမြန်လုပ်ချင်ရင် ၁၅ မိနစ်နဲ့နှပ်လဲရပါတယ်။ အမြန်လိုချင်ရင် လက်ဖက်အချိုခြောက်ကို ထမင်းစားဇွန်း ၆ ဇွန်းထည့်ပြီး မီးပြင်းပြင်းဖြင့်တည်ပါ။) တချို့က အ၀တ်နဲ့လက်ဖက်အချိုခြောက်ကို ထုတ်ပြီးတော့ နှပ်ပါတယ်။ ဒီအတိုင်းနှပ်ပြီးမှ ရေစစ် နဲ့စစ်ယူလည်းရပါတယ်။
၂။ အဖန်ရည် ကောင်းကောင်းလိုချင်ရင်တော့ တစ်နာရီလောက် နှပ်ပါ။ (ပိုကြာကြာနှပ်ရင်လဲကောင်းပါတယ်။) အိုးမှာမှတ်ထားတဲ့ရေအမှတ်အောက် မရောက်အောင် ရေကို ဖြည့်ဖြည့်ပေးပါ။ ၁ နာရီလောက် နှပ် အပြီး မှတ်ထားသော ရေတလီတာအကျန်မှာ မီးဖိုပေါ်မှချပါ။
၃။ လက်ဖက်ရည်ပုံမှန်ခွက် (240ml) တခွက်ဖျော်ရန်အတွက် နို့စိမ်း ထမင်းစားဇွန်း ၃ ဇွန်း ကို ခွက်ထဲ အရင်ထည့်ပါ။ ပြီးမှ အဖန်ရည်ကို ရေစစ်ဖြင့် စစ်၍နို့စိမ်းအပေါ်မှခွက်ထဲကို ဖြည့်ထည့်ပါ။ နို့ဆီ လက်ဖက် ရည်ဇွန်း ၁ ဇွန်း (သို့) ၁ ဇွန်းခွဲထည့်၍ မွှေပါ။
၄။ လက်ဖက်ရည်ဆိမ့်ဆိမ့်လေးကို မလိုင်ဖတ်လေးထည့်ပြီး သုံးဆောင်နိုင်ပါပြီ။
Party အတွက် လက်ဖက်ရည်ဖျော်မည်ဆိုလျှင်
၁။ လက်ဖက်ရည်အချိုခြောက် ထမင်းစားဇွန်း ၁၂ ဇွန်းကို ေ၇ ၄ လီတာ ဖြင့် အထကပါနည်းအတိုင်းရေ ၄လီတာ လျော့သွားရင် ထပ်ထပ်ဖြည့်ပြီး နှပ်ပေးပါ။ (5 L အိုးဖြင့် နှပ်ပါ။)
၂။ ပြီးလျှင် ရေစစ်ဖြင့် စစ်ပါ။
၃။ ၅ လီတာ ဆန့်တဲ့အိုးထဲမှာ အဖန်ရည်ထည့်၊ နို့စိမ်း ၂ ဗူး ကို ထည့် ၊ နို့ဆီဗူး တ ၀က် (သို့) တဗူး ကို ထည့်၍ ဖျော်နိုင်ပါတယ်။
မှတ်ချက်။ ။ လက်ဖက်အချိုခြောက်ကို အိန္ဒိယကုန်ပစ္စည်းရောင်းတဲ့ ဆိုင်တွေမှာလဲရနိုင်ပါတယ်။ Lipton Tea အထုပ်ကိုလည်း အသုံးပြုနိုင်ပါတယ်။
No comments:
Post a Comment